प्रधानमन्त्री–निर्वाचन आयोग संवाद : मतदाता दर्ता म्याद पाँच दिनले बढ्न सक्ने संकेत

काठमाडौं। प्रधानमन्त्री सुशीला कार्कीले आगामी प्रतिनिधिसभा निर्वाचनलाई लक्षित गर्दै मतदाता नामावली दर्ताको समय थप्न निर्वाचन आयोगलाई औपचारिक आग्रह गरेकी छन्।

प्रधानमन्त्री कार्कीको सचिवालयका अनुसार उनले आयोगका कार्यवाहक प्रमुख निर्वाचन आयुक्त रामप्रसाद भण्डारीसँग टेलिफोन वार्ता गरी नामावली दर्ता म्याद विस्तारलाई जरूरी कदमका रूपमा अघि सारिन्।

आयोगले फागुन २१ गतेका लागि घोषणा भएको प्रतिनिधिसभा निर्वाचनका लागि कात्तिक ३० सम्म मतदाता नामावली दर्ता गर्ने समय सीमा तोकेको थियो। तर पछिल्ला दिनहरूमा नाम दर्ताका लागि नागरिकको उत्साह र अत्यधिक चाप बढ्दै गएपछि प्रधानमन्त्री कार्कीले म्याद थप्न अनुरोध गरेकी हुन्।

प्रधानमन्त्री सचिवालयका अनुसार, आयुक्त भण्डारीले अधिकतम पाँच दिनसम्म म्याद थप्न सकिने प्रारम्भिक जवाफ दिएका छन्।