एक लाखभन्दा बढीले निम्न माध्यमिक तहको अध्यापन अनुमतिपत्रको परीक्षा

काठमाडौं : देशभरका एक लाख भन्दा बढी परीक्षार्थीहरूले निम्न माध्यमिक तहको अध्यापन अनुमतिपत्रको परीक्षामा सहभागी हुने भएका छन्। शिक्षक सेवा आयोगले सार्वजनिक गरेको परीक्षा केन्द्र,रोल्न अनुसार १ लाख एक हजार ७ सय ८३ जना परीक्षामा सहभागी हुने छन्।

उक्त परीक्षा मंसिर २० गते सञ्चालन हुँदै छ। आयोगका अनुसार कोशी प्रदेशबाट १७ हजार २ सय ३८,मधेश प्रदेशबाट १५ हजार ७ सय १६,बागमती प्रदेशबाट १३ हजार एक सय ५६,गण्डकी प्रदेशबाट ६ हजार ८ सय ८६ जना परीक्षामा सहभागी हुने भएका छन्।

यस्तै,लुम्बिनी प्रदेशबाट २० हजार पाँच सय २५ जना,कर्णाली प्रदेशबाट १९ हजार १२ जना र सुदूरपश्चिम प्रदेशबाट ९ हजार २ सय ५० जना सहभागी हुने भएका छन्।
आयोगले यस पटक पनि काठमाडौं उपत्यका(काठमाडौं,भक्तपुर र ललितपुर)मा परीक्षा केन्द्र तोकेको छैन।

जसकारण बागमती प्रदेशको हकमा परीक्षा दिनलाई परीक्षार्थीहरू हेटौडा र चितवन नै जानुपर्ने बाध्य बनाइएकाे छ। कात्तिक २२ गते भएको माध्यमिक तहको अध्यापन अनुमतिपत्रको परीक्षाको बेला पनि काठमाडौं उपत्यकामा परीक्षा केन्द्र तोकिएको थिएन। त्यसो त परीक्षा केन्द्र टाढा पारिएको परीक्षार्थीहरूको गुनासो छ।