आइटी कम्पनीलाई विदेशमा लगानी गर्न २० हजार डलरसम्म नि:सर्त सटही सुविधा

काठमाडौं।नेपाल राष्ट्र बैंकले सेवा निर्यात गर्ने सूचना तथा प्रविधि (आइटी) कम्पनीलाई विदेशमा लगानी गर्न २० हजार अमेरिकी डलरसम्मको विदेशी मुद्रा सटही नि:सर्त उपलब्ध गराउने व्यवस्था गरेको छ। केन्द्रीय बैंकले विदेशी लगानी तथा विदेशी ऋण व्यवस्थापन वि नियमावली २०७८ संशोधन गर्दै उक्त सुविधा लागू गरेको हो।

संशोधित विनियमावलीअनुसार पछिल्ला कम्तीमा तीन आर्थिक वर्ष सेवा निर्यात गरी विदेशी मुद्रा आर्जन गरेका आईटी कम्पनीले विदेशमा लगानीका लागि यो सुविधा लिन सक्नेछन्। साथै, विदेशी मुद्रा सटहीका लागि अब नेपाल राष्ट्र बैंकमै जानुपर्ने बाध्यता हटाउँदै वाणिज्य बैंकमार्फत पनि सटही गर्न सकिने व्यवस्था गरिएको छ।

विनियमावलीमा आईटी उद्योगले आफ्नो चुक्ता पुँजीको सीमाभित्र रही विदेशका आईटीसम्बन्धी क्षेत्रमा लगानी गर्न पाउने, विदेशी ऋणको सीमा तथा ब्याजदरसम्बन्धी प्रावधानमा लचिलो व्यवस्था गरिएको राष्ट्र बैंकले जनाएको छ। यो निर्णयले आईटी क्षेत्रको विस्तार, विदेशी बजारमा पहुँच र सेवा निर्यात प्रवर्द्धनमा सहयोग पुग्ने अपेक्षा गरिएको छ।