समानुपातिकतर्फ ५८ चुनाव चिह्नसहित मतपत्र छापिने

काठमाडौँ। फागुन २१ गते हुने प्रतिनिधिसभा निर्वाचनका लागि समानुपातिकतर्फ ५८ चुनाव चिह्नसहित मतपत्र छापिने भएको छ।

आयोगले शुक्रवार आयोजना गरेका पत्रकार सम्मेलनमा प्रवक्ता नारायणप्रसाद भट्टराईले उक्त जानकारी दिनुुभएको छ।

समानुपातिक निर्वाचन प्रणालीतर्फ भाग लिन ९३ वटा राजनीतिक दलले नाम दर्ता गराएका थिए। तीमध्ये ६४ वटा दलले मात्रै समानुपातिकतर्फको बन्दसूची पेश गरेको उहाँले जानकारी दिनुभयो।

बन्दसूची पेश गर्ने दलहरूमध्ये ५४ वटा दलले आ–आफ्नै निर्वाचन चिह्न प्रयोग गरी चुनावमा प्रतिस्पर्धा गर्ने भएका छन् भने बाँकी १० वटा दलले विभिन्न क्लस्टरमा रही चारवटा साझा निर्वाचन चिह्नमार्फत निर्वाचनमा भाग लिने गरी बन्दसूची पेश गरेका छन्। उहाँले यसअघि बन्दसूची पेश हुनुअघि नै मतपत्र छपाइको काम गरिएको भएकाले सबै दलका चुनाव चिह्न समेटेर मतपत्र छापिने गरेको बताउनुभयो।

उहाँका अनुसार हालसम्मको विवरणअनुसार समानुपातिकतर्फ प्रयोग हुने निर्वाचन चिह्नको संख्या ५८ रहने लगभग निश्चित भएको छ। आयोगले बन्दसूचीको रुजु प्रक्रिया जारी राखेकाले कुनै दलको सूची अस्वीकृत भएमा सो संख्या घट्नसक्ने उहाँले बताउनुभयो।

भट्टराईले भन्नुभयो,‘६४ वटा दलले समानुपातिकतर्फको बन्दसूची पेश गरेका छन्। अहिले ५८ वटा चुनाव चिह्न मतपत्रमा रहने निश्चित जस्तै भयो।’

उहाँले बन्दसूचीमा समानुपातिक कलष्टर नमिलेको अवस्था र बन्दसूचीमा भएको उम्मेदवारले नाम फिर्ता लिन चाहेका वेला मात्रै बन्दसूचीमा रहेका नाम परिवर्तन गर्न सकिने बताउनुभयो। अन्यथा नाम परिवर्तन गर्न नमिल्ने उहाँको भनाइ छ।