रास्वपामा प्रवेश गरे नाउपाका नेता

काठमाडौं। सुदूरपश्चिम प्रदेशसभा सदस्य लक्ष्मणकिशोर चौधरी राष्ट्रिय स्वतन्त्र पार्टी (रास्वपा)मा प्रवेश गर्नुभएको छ।

नागरिक उन्मुक्ति पार्टी (नाउपा)बाट कैलाली निर्वाचन क्षेत्र नम्बर १ प्रदेशसभा (ख)मा विजयी भएका चौधरी सोमबार रास्वपामा प्रवेश गर्नुभएको छ।

नाउपाका पूर्वनेतृत्वहरू, थरुहट–थारुवान अभियान्ताहरू र रास्वपाबीच आज भएको समायोजनसभामा चौधरी पनि सहभागी छन् । २०७९ सालको प्रदेशसभा निर्वाचनमा विजयी भएका चौधरी उद्योग, पर्यटन, वन तथा वातावरणमन्त्री पनि बनिसक्नुभयो।

यस्तै, तत्कालीन नाउपाका वरिष्ठ उपाध्यक्ष दामोदर पण्डित पनि रास्वपा प्रवेश गर्नुभयो। सोही पार्टी नेताहरू राजेश अधिकारी, कोमल ज्ञवाली, ठाकुरसिंह थारु, थरुहट नेता लक्ष्मण थारु, तुलसी चौधरी, सुरेन्द्र चौधरी पनि रास्वपामा प्रवेश गर्नुभयो।

नाउपा अध्यक्ष रञ्जिता श्रेष्ठले केही समयअघि नेपाली कम्युनिस्ट पार्टी (नेकपा)सँग एकता गर्नुभयो। पार्टीभित्र कुनै सल्लाह नगरी एकता गरेको भन्दै सुदूरपश्चिमका नेताहरू असन्तुष्ट हुनुहुन्छ । सुदूरपश्चिम प्रदेशसभामा मात्रै नाउपाका सात जना सांसद हुनुहुन्छ।