दुईपक्षबीच सहमति र सहयात्राको प्रयास गर्दा पनि सफल नभएको चन्द्र भण्डारीको अभिव्यक्ति

काठमाडौँ। नेपाली कांग्रेसभित्र विशेष महाधिवेशन, नेतृत्व चयन र संस्थापन पक्षको कारबाहीलाई लिएर चर्किएको विवादबीच कांग्रेस नेता डा. चन्द्र भण्डारीले आफूले दुवै पक्षबीच सहमति र सहयात्राको प्रयास गर्दा पनि सफल नभएको अभिव्यक्ति दिनुभएको छ।

फेसबुकमार्फत शुभेच्छुक, शुभचिन्तक र पार्टीका साथीहरूलाई सम्बोधन गर्दै उहाँले भन्नुभएको छ- ‘एउटै रेलमा सबै सँगै अघि बढौँ भन्ने चाहना थियो। यात्रु बोलाउँदै-बोलाउँदै रेल भने हिँडिसक्यो।’

विशेष महाधिवेशनको पहिलो चरणमा भृकुटीमण्डप पुगेर गगन थापा र विश्वप्रकाश शर्मालाई साथ दिएका भण्डारी पछि विशेष क्षणमा नजाँदा उनीमाथि चर्को आलोचना हुँदै आएको छ। यही आलोचनाको सन्दर्भमा उहाँले आफू दुवै पक्षलाई लिएरसँगै हिँड्न चाहेको भए पनि परिस्थितिले त्यो सम्भव नभएको संकेत गर्नुभएको छ।

पोस्टमा भण्डारीले पार्टीभित्र देखिएको विकृति, गालीलाई राजनीति ठान्ने प्रवृत्ति र जिम्मेवारीबोधको अभावप्रति प्रश्न उठाउनुभएको छ। उहाँले भन्नुभयो,`  सत्य, अनुशासन र नैतिकताविनाको राजनीति न पार्टीलाई बलियो बनाउने न लोकतन्त्र सुरक्षित राख्ने स्पष्ट पारेका छन्।

‘आफ्नै घर भत्काएर जनताको विश्वास जितिन्छ भन्ने भ्रम कसले रोप्यो ?’ भन्ने प्रश्न गर्दै उहाँले विनाश होइन, निर्माण रोज्न र विवेकमा फर्किन सबैलाई आह्वान गर्नुभएको छ।

यता, विशेष महाधिवेशनले गगनलाई सभापति बनाउँदै नयाँ केन्द्रीय समिति गठन गरेको छ।