ओली र बालेनसँग भिड्न नेकपाले झापा पठायो रन्जित तामाङ

काठमाडौँ। नेपाली कम्युनिष्ट पार्टी (नेकपा) ले आगामी २१ फागुनमा हुने प्रतिनिधिसभा निर्वाचनमा झापा–५ बाट युवा नेता रञ्जित तामाङलाई उम्मेदवार बनाउने भएको छ। नेकपाका संयोजक पुष्पकमल दाहाल प्रचण्डले शनिबार ललितपुरको हात्तीवनस्थित निवासमा बोलाएर नेकपाका केन्द्रीय सदस्यसमेत रहेका तामाङलाई उम्मेदवारको टिकट दिनुभएको हो।

निर्वाचन आयोगले तय गरेको कार्यतालिका अनुसार आगामी ६ माघमा उम्मेदवारको मनोनयन दर्ता हुनेछ। तामाङले झापा–५ को टिकट आफूले पाएको बताए। संयोजक प्रचण्डले जितको शुभकामनासहित आफूलाई टिकट प्रदान गरेको जानकारी उहाँले दिनुभयो ।

‘प्रचण्ड कमरेडले झापा–५ को टिकट दिनुभयो’, तामाङले भन्नुभयो, ‘जितको अग्रिम शुभकामनासहित जसरी पनि जित्नुपर्छ भन्नुभएको छ।’ झापा ५ केपी शर्मा ओलीको पुरानो क्षेत्र हो। ओली पटकपटक सोही क्षेत्रबाट लड्दै सांसद र प्रधानमन्त्री बन्दै आउनुभएको छ। यसपटक यस क्षेत्रबाट काठमाडौँ महानगरका मेयर बालेन शाह पनि भिड्ने तयारीमा हुनुहुन्छ। विगतमा झापा ५ मा ओलीको सानदार जित हुने गरे पनि यसपटक त्रिपक्षीय भिडन्त हुने सम्भावना छ।