कुलमानको प्रतिवद्धताः जेन–जी शहीदको भावनाअनुसार काम गरेँ, उनीहरुको बलिदान खेर जान दिनेछैन

काठमाडौँ। उज्यालो पार्टी नेपालका अध्यक्ष कुलमान घिसिङले जेन–जी शहीदको भावनाअनुसार आफूले काम गर्ने बताउनुभएको छ ।

शनिवार ललितपुरमा आयोजित एक कार्यक्रमलाई सम्बोधन गर्दै उहाँले यस्तो बताउनुभएको हो । उहाँले आफू मन्त्री हुँदा पनि जेन–जीको भावनाअनुसार काम गरेको र आगामी दिनमा पनि सोही कुरालाई निरन्तरता दिने जिकिर गर्नुभयो ।

उहाँले आफू जेन–जी शहीदको अन्त्येष्टिदेखि उपचाररतहरुको अवस्थाबारे पनि जानकारी लिँदै सबै कुरामा सहभागी भएकाले धेरै कुरामा जानकार रहेको बताउनु भयो । जेन–जीको बलिदानलाई मर्न नदिने र त्यसका लागि आगामी निर्वाचनमा आफूहरु उज्यालो पार्टी नेपाल दर्ता गरेर निर्वाचनमा होमिएको बताउनु भयो ।

उहाँले भन्नुभयो, ‘शहीद परिवारको भावना मैले पनि बुझेको छु, धेरै ठाउयँमा पुगेको छु । आर्यघाटमा पुगेको छ । मलाई धेरै पीडा हुन्थ्यो । हामीले बोल्ने भन्दा पनि भावनाले बुझेर काम गरेका थियौँ । मैले मन्त्री भएको नाताले सकेको काम जति गरेको छु । स्ट्याच्यु र जेन–जी पार्क बनाउने बारेमा केही समय लाग्यो र त्यो काम अब आउने सरकारले निरन्तरता दिनेछ । आगामी सरकारको नेतृत्वको लागि संसदमा हामी उपस्थित हुनका लागि उज्यालो पार्टी नेपाल दर्ता गरेर आएका छौँ । शहीदहरुको सपना पूरा गर्नकै लागि हामी राजनीतिक क्षेत्रमा आएर केही न केही योगदान दिनुपर्छ भन्ने हिसावले आएका छौँ । सबै नेपाली जनता, शहीद परिवारको साथ सहयोग हुनेछ भन्ने विश्वास छ । सधैँ मेरो प्रयास शहीद परिवारको दुःखमा साथ दिनेछु ।’

उहाँले शहीद परिवारसँग आफ्नो पार्टीले दीर्घकालीन रुपमा सहयो गरेर अघि बढ्ने प्रीतवद्धता जनाउनु भयो ।–न्युज एजेन्सी नेपाल