सर्लाहीको मलंगवामा फैलियो दादुरा रोग

मलंगवा। सर्लाहीको मलंगवा नगरपालिका–३ मा दादुरा रोगको सङ्क्रमण फैलिएको छ।

हालसम्म सात जना दादुरा संक्रमित फेला परेका छन् भने २२ जनालाई सङ्क्रमणको आशंकामा घरमै निगरानीमा राखिएको स्वास्थ्य कार्यालयले जनाएको छ।

स्वास्थ्य कार्यालय सर्लाहीका प्रमुख डा. नवलकिशोर झाका अनुसार दादुरा अत्यन्तै छिटो फैलिने सङ्क्रामक रोग भएकाले सर्वसाधारणलाई आवश्यक सतर्कता अपनाउन अनुरोध गरिएको छ।

दादुरा नियन्त्रण तथा बालबालिकालाई सुरक्षित राख्न माघ १२ देखि १६ गतेसम्म मलंगवाका वडा नम्बर २, ३, ४, ८, ९ र १० मा विशेष खोप अभियान सञ्चालन गरिनेछ।

अभियानअन्तर्गत ६ महिनादेखि १४ वर्षसम्मका बालबालिकालाई दादुराविरुद्धको खोप दिइने स्वास्थ्य शाखाले जनाएको छ।

स्वास्थ्य कार्यालयले अभिभावकलाई आफ्ना बालबालिकालाई नजिकैको खोप केन्द्रमा अनिवार्य रूपमा खोप लगाउन आग्रह गरेको छ।