काठमाडौं । सर्वोच्च अदालतको ठाडो आदेशबाट गठनबन्धनबाट प्रधानमन्त्री बनेका कांग्रेसका सभापति शेरबहादुर देउवा नेतृत्वको सरकार गठन भएको आज १ बर्ष पूरा भएको छ ।
प्रधानमन्त्री देउवाको नेतृत्वमा गत वर्षको असार २९ गते सरकार गठन भएको थियो ।प्रधानमन्त्री देउवा नेतृत्वको सरकार गठन भएको १ वर्ष पूरा गरेको अवसरमा सरकारले वर्षभरी गरेका कामको विवरण सार्वजनिक गरेको छ ।
यो १ वर्षमा पालिका चुनाव सम्पन्न, सबै नागरिकलाई कोरोनाविरुद्धको खोप उपलब्ध गराइएको, गरिबीको रेखामुनि रहेका परिवारलाई अत्यावश्यक वस्तु सुपथ मूल्यमा उपलब्ध गराउन गरिब घरपरिवार परिचयपत्रको सुरुवात गरिएको, संकटग्रस्त उद्योगधन्दा र विपन्न तथा बेरोजगारलाई विशेष प्याकेजको व्यवस्था गरिएको, क्यान्सर, मिर्गौला र स्पाइनल इन्जुरीका बिरामीलाई मासिक ५ हजार रुपैयाँ भत्ता दिन सुरुवात भएको लगायतका उपलब्धि विवरणमा समेटिएका छन् ।
त्यस्तै, केपी शर्मा ओली नेतृत्वको सरकारले निम्त्याएको अस्थिरता र कुशासनको अन्त्य गरेर देशलाई लोकतान्त्रिक विधि र पद्धतिमा अघि बढाउन सफल भएको पनि दाबी गरिएको छ ।