रास्वपा लगायतका नयाँ दलहरू नालायक छन् : घनश्याम भुसाल

काठमाडौँ। नेकपा (संयुक्त)का कार्यवाहक अध्यक्ष घनश्याम भुसालले राष्ट्रिय स्वतन्त्र पार्टी (रास्वपा)लगायतका दलहरू नालायक भएको दावी गर्नुभएको छ।

शुक्रवार विराटनगरमा स्थानीय सञ्चारकर्मीमाझ उहाँले यस्तो दाबी गर्नुभएको हो। कार्यवाहक अध्यक्ष भुसालले पुराना भनिएका दलहरूले मुलुकमा संकट निम्त्याएको बताउँदै नयाँ भनिएका दलहरूमा त्यो संकट समाधान गर्न क्षमता नभएकाले मुलुक दुर्घटनातर्फ उन्मुख रहेको बताउनुभयो।

उहाँले नयाँ राजनीतिक दलहरू नालायक भएकाले यसबाट पनि जनताले कुनै पनि खालको अपेक्षा गर्ने अवस्था नभएको तर्क गर्नुभयो।

भुसालले भन्नुभयो,‘मैले राजनीतिक रूपमा मात्रै भन्छु- पुराना पार्टीहरु, जो दलाल पुँजीवादीसँग, बिचौलियातन्त्रसँग उनीहरूले लगनगाँठो गाँसेका थिए। त्यो संकट जेनजीका रूपमा आएको हो। यी पार्टीहरूबाट हामीले अपेक्षा गर्ने अवस्था भएन। यसबाट भएन भने लायकहरू त कोही न कोही आउनुपर्थ्यो। नयाँहरू पनि नालायक भए। तिनीसँग पनि विचार छैन, एजेण्डा छैन। यसकारण मुलुकमा हुने त दुर्घटना नै हो।’

कार्यवाहक अध्यक्ष भुसालले पुराना दलहरूले दलाल पुँजीवादीहरूको सेवा गरेकाले त्यसका विरुद्ध जेनजी आन्दोलन भएको बताउनुभयो