विदेश पठाउने भन्दै लाखौँ रकम ठगी गरेको अभियोगमा पाँच पक्राउ

काठमाडौं। वैदेशिक रोजगारीका लागि विभिन्न देश पठाउने भन्दै लाखौँ रकम ठगी गरेको अभियोगमा प्रहरीले पाँच जनालाई पक्राउ गरी सार्वजनिक गरेको छ ।

ठगी अभियोगमा ललितपुर धापाखेल बस्ने ४३ वर्षीया विना महर्जन, ४५ वर्षीया विन्दा महर्जन, बागलुङ काठेखोला गाउँपालिका–२ की ४३ वर्षीया कोपिला शर्मा, धनकुटा नगरपालिका–२ का ३१ वर्षीय सन्तोष राई तथा काभ्रेको चौंरीदेउरीली नगरपालिका–९ की ४८ वर्षीया कुमारी तामाङलाई पक्राउ गरिएको काठमाडौं उपत्यका अपराध अनुसन्धान कार्यालयका प्रहरी उपरीक्षक मनोहरप्रसाद भट्टले जानकारी दिनुभयो।

पक्राउ परेकामध्ये विना र विन्दाले अमेरिका पठाइदिने भन्दै दश लाख, कोपिलाले बेलायत पठाइदिने भन्दै १३ लाख रुपैयाँ ठगी गरेको पाइएको छ ।

यस्तै, सन्तोषले कम्बोडिया पठाइदिने भन्दै तीन लाख ७० हजार तथा कुमारीले पोर्चुगल पठाइदिने भन्दै १३ लाख ६० हजार लिई फरार भएको प्रहरी उपरीक्षक भट्टले जानकारी दिनुभयो।

पक्राउ परेमा पाँचै जनालाई आवश्यक अनुसन्धान तथा कारबाहीका लागि वैदेशिक रोजगार विभागमा पठाइएको प्रहरी उपरीक्षक भट्टले बताउनुभयो।