अफ्रिकी संघको कार्यकारी परिषद्को बैठक शुरु, जल सुरक्षा, एकता र शान्तिमा जोड

अफ्रिकी संघको कार्यकारी परिषद्को ४८ औं साधारण सत्र बुधवार इथियोपियाको राजधानी अडिस अबाबास्थित एयू मुख्यालयमा शुरु भएको छ । ३९ औं एयू शिखर सम्मेलनको ढाँचा अन्तर्गत सदस्य राष्ट्रका परराष्ट्रमन्त्रीहरूको सहभागितामा यो दुई दिने बैठक आयोजना भइरहेको छ । यस बैठकको मुख्य विषय ‘एजेण्डा २०६३ का लक्ष्यहरू प्राप्त गर्न दिगो जल उपलब्धता र सुरक्षित सरसफाइ प्रणाली सुनिश्चित गर्ने’ रहेको छ ।

उद्घाटन सत्रलाई सम्बोधन गर्दै एयू आयोगका अध्यक्ष महमुद अली युसुफले पानी र सरसफाई सबै देशहरूका लागि महत्वपूर्ण रहेको र यसलाई संरक्षण गरिनुपर्ने स्रोतको रूपमा हेरिनुपर्ने बताउनु भयो । यो दैनिक जीवनका लागि मात्र नभई हामीलाई एकजुट बनाउने कारक पनि बन्नुपर्ने बताउनु भयो । युसुफले गिनि र गेबोनको संघमा पुनरागमनको स्वागत गर्नुभयो भने म्याडागास्कर र गिनी–बिसाउमा भएको असंवैधानिक सत्ता परिवर्तनप्रति चिन्ता व्यक्त गर्नुभयो ।

यस्तै, इथियोपियाका विदेशमन्त्री गेडियन टिमोटियोसले सामूहिक सुरक्षा र समृद्धिका लागि एकताको महत्वमा जोड दिनुभयो। उहाँले सन् २०२५ मा अफ्रिकी महादेशीय मुक्त व्यापार क्षेत्रमार्फत क्षेत्रीय एकीकरण बलियो भएको बताउनु भयो । यो बैठकले फेब्रुअरी १४–१५ मा हुने राष्ट्राध्यक्ष र सरकार प्रमुखहरूको शिखर सम्मेलनको कार्यसूची तयार गर्नेछ र जी–२० मा अफ्रिकी संघको सहभागिता लगायतका विषयमा छलफल गर्नेछ ।