काठमाडौँ। विद्यालय शिक्षा विधेयक संसद्बाट पारित गर्न दबाब दिँदै नेपाल शिक्षक महासंघ अहिले सडकमा छ। लामो समयसम्म विधेयक पारित गर्न सरकारले वेवास्ता गर्दा शिक्षकहरू आन्दोलित बनेका हुन्।
महासंघले यसअघिको हिउँदे अधिवेशनबाटै विधेयक पारित गर्न दबाब दिएको थियो। तर सरकारले चासो नदेखाउँदा फेरि महासंघ आन्दोलनमा होमियो। अहिले महासंघ निर्णायक आन्दोलनमा छ। शिक्षकहरू ‘कि बितिन्छ, कि जितिन्छ’ नारासहित झन्डै ३ लाख शिक्षक काठमाडौँ आएका छन्।
शिक्षकहरूलाई सरकारले वार्तामा बोलाएको छ। तर, शिक्षकहरू वार्ता अस्वीकार गर्दै आन्दोलनमा छन्। महासंघले सरकारसामु ३ विकल्प अघि सारेका छन्। उनीहरूले सरकारले अध्यादेशबाट निकास दिन पहिलो विकल्प अघि सारेका छन्। उनीहरूले तत्काल अध्यादेश ल्याएर भए पनि शिक्षा विधेयक जारी गरोस् भन्ने चाहेका छन्।
नेपाल विद्यालय कर्मचारी परिषद्का अध्यक्ष नन्दराम तिवारीका अनुसार अर्को विकल्पका रूपमा बर्खे अधिवेशन तत्काल बोलाएर प्रक्रिया अगाडि बढाउन अनुरोध गरेको छ। तेस्रो विकल्पमा संसद्को विशेष अधिवेशन आह्वान गरेर ऐन जारी गर्न अनुरोध गरिएको छ। समग्रमा, शिक्षकहरू ऐन नलिइ घर नफर्किने तयारीमा छन्।
