जापानी मोटर कम्पनी निसानद्वारा आर्थिक वर्ष २०२५ मा ६५० अर्ब येन घाटा हुने प्रक्षेपण

जापानको निसान मोटर कम्पनीले आगामी महिना समाप्त हुने आर्थिक वर्ष २०२५ का लागि ६५० अर्ब येन/करिब ४।२५ अर्ब अमेरिकी डलरको खुद घाटा हुने प्रक्षेपण गरेको छ । यो निसानका लागि लगातार दोस्रो वर्षको घाटा हुनेछ ।

अघिल्लो आर्थिक वर्षमा ६७०।९ अर्ब येनको खुद घाटा बेहोरेको यस गाडी निर्माताले उच्च अमेरिकी भन्सार महसुलका साथै जापान र संयुक्त राज्य अमेरिकामा जारी कमजोर विक्रीलाई यसको कारण बताएको छ । डिसेम्बरसम्मको नौ महिनाको अवधिमा कम्पनीले २५०।२ अर्ब येनको खुद घाटा रिपोर्ट गरेको छ । जबकि अघिल्लो वर्ष सोही अवधिमा ५।१ अर्ब येन नाफा भएको थियो । त्यसैगरी, अघिल्लो वर्ष ६४।०१ अर्ब येन सञ्चालन नाफा भएकोमा यस पटक १०।११ अर्ब येन सञ्चालन घाटा भएको छ ।

आफ्नो नाफा पुनः प्राप्त गर्ने प्रयासमा निसानले व्यापक सुदृढीकरण अभियान चलाइरहेको छ । यस अन्तर्गत कम्पनीले विश्वभर आफ्ना कारखानाहरूको संख्या १७ बाट घटाएर १० मा सीमित गर्ने र आर्थिक वर्ष २०२७ सम्ममा २० हजार रोजगारी कटौती गर्ने योजना बनाएको छ । संघर्षरत कार निर्माताले पुनर्संरचना लागतको विस्तृत विवरण भने गोप्य राखेको छ । मुख्य कार्यकारी अधिकृत इभान एस्पिनोसाले पत्रकार सम्मेलनमा कम्पनीको कार्यबल घटाउने गति तालिका भन्दा केही अगाडि बढिरहेको बताएका छन् ।