प्रत्यक्ष निर्वाचित प्रणाली चाहनेले चुनवाबाटै आउनुपर्छ: रक्षा बम

काठमाडौं। नेपाल जेनजी फ्रन्टकी संयोजक रक्षा बमले प्रत्यक्ष निर्वाचित प्रणाली राख्न चाहनेहरूलाई घोषणापत्रमै उक्त एजेन्डा राखेर चुनावमा जान अनुरोध गर्नुभएको छ।

प्रत्यक्ष निर्वाचित कार्यकारी र संविधान संशोधन गर्नका लागि ड्राफ्ट बोकेर हिडेर नहुने बताउँदै उहाँले चुनावमा त्यसलाई एजेन्डा बनाएर जनतामा जान आग्रह गर्नुभएको हो।

‘हेक्का रहोस, देश भनेको जादुको छडीले चल्ने चीज होइन। देश चलाउनका लागि विधिको शासन, लोकतान्त्रिक मूल्य मान्यता र जनपक्षीय सहभागिताको आवश्यकता पर्छ। उल्लिखित मुद्दाहरूको विषयमा व्यापक छलफल हुनु जरूरी छ,’ बमले सामाजिक सञ्जालमा लेख्नुभएको छ।

संविधानको पुनरवलोकनको पक्षमा भए पनि त्यसका लागि जनादेश चाहिने उहाँको भनाइ छ। उहाँले संक्रमणकालीन समयमा अनावश्यक हस्तक्षेप गर्न खोज्नेहरूलाई होसियार हुन पनि चेतावनी दिनुभएको छ। देशलाई अनिश्चिततातर्फ धकेल्न खोजे आफूहरूले विरोध गर्ने उहाँले बताउनुभयो।