मेडिकल काउन्सिलले चिकित्सकलाई विज्ञापनमा फोटो प्रयोग नगर्न दियो चेतावनी

काठमाडौं । नेपाल मेडिकल काउन्सिल (एनएमसी)ले  चिकित्सकहरूले विभिन्न कन्सल्टेन्सी तथा व्यापारिक संस्थाका व्यावसायिक प्रचार–प्रसारका सामग्रीमा आफ्नो नाम, फोटो र डिजिटल साइनबोर्ड, होर्डिङ बोर्ड तथा ब्रान्ड प्रमोशनको माध्यमबाट संलग्न भइरहेकोप्रति गम्भीर विषयप्रति ध्यानाकर्षण गराएको छ।

काउन्सिलले मंगलबार जारी गरेको सूचनामा यस प्रकारको गतिविधि Code of Ethics & Professional Conducts 2017 को प्रत्यक्ष उल्लङ्घन भएको स्पष्ट उल्लेख गरेको छ।

सो कोडको बुँदा नं. ५ए (5A)  अनुसार, “कुनै पनि मेडिकल अभ्यासकर्ताले आफ्नो नाम कुनै पनि व्यापारिक साइनबोर्ड, सेवा प्रचार–प्रसार वा वस्तु–सामानको मार्केटिङमा देखिने गरी राख्न नहुने” व्यवस्था छ।

विज्ञप्तिमा भनिएको छ, “साइनबोर्ड वा अन्य कुनै पनि प्रचार सामग्रीमा चिकित्सकको नाम–पहिचान राखेर व्यापारिक फाइदा लिन खोजिने प्रवृत्ति चिकित्सकीय मर्यादा र व्यावसायिक आचरणविरुद्ध छ।”

एनएमसीले यस्तो कार्य नगर्न र गराएमा कोड अफ एथिक्सको बुँदा नं. 9 अनुसार “आवश्यक कारबाही तथा सजाय” हुने चेतावनी दिँदै सबै चिकित्सकलाई आचारसंहिताको कडाइका साथ पालना गर्न आग्रह गरेको छ।

एनएमसीका रजिष्ट्रार डा. सन्तोष कुमारदेवद्वारा हस्ताक्षरित सूचनाले सम्पूर्ण चिकित्सक समुदायलाई “व्यावसायिक मर्यादा, नैतिकता र जनता माझको विश्वास जोगाइ राख्न” पुनः ध्यानाकर्षण गराएको छ।