ओलीलाई नेतृत्व दिनु नै उत्तम : बादल

काठमाडौं। नेकपा (एमाले)का उपाध्यक्ष रामबहादुर थापा (बादल) ले वर्तमान राजनीतिक परिस्थितिमा अध्यक्ष केपी ओलीको नेतृत्वलाई निरन्तरता दिनु पार्टी र राष्ट्र दुवैको आवश्यकता भएको बताउनुभएको छ।

प्रेस चौतारी नेपालले शुक्रबार गरेको कार्यक्रममा बोल्दै उहाँले अहिले लोकतान्त्रिक राजनीतिक दलको नेतृत्वलाई कमजोर बनाइ प्रतिक्रिया उन्मुख शक्तिहरू अघि बढ्ने प्रयत्‍नमा रहेको बताउनुभयो।

यसविरुद्ध जुध्न पार्टीभित्र एकता, निरन्तरता र नेतृत्व संरक्षण अहिलेको अपरिहार्य आवश्यकता रहेको उहाँको भनाइ छ।

‘राजनीतिक दलको नेतृत्व विस्थापित गर्ने प्रयास भइरहेको छ, नेतृत्वलाई विस्थापित गरेर मात्र प्रतिक्रान्ति सफल हुन्छ भन्ने सोचबाट प्रतिगामी शक्ति अघि बढेका छन्’, थापाले भन्नुभयो।

उहाँले पार्टीको ११ औँ राष्ट्रिय महाधिवेशन ‘सामान्य महाधिवेशन नभई प्रतिक्रान्ति विरुद्धको निर्णायक राजनीतिक मोड’ भएको टिप्पणी गर्नु्भयो।