नेपालले इटलीलाई दियो १ सय २४ रनको लक्ष्य

काठमाडौं : टी–२० विश्वकप क्रिकेटमा नेपालले इटलीलाई जितका लागि १ सय २४ रनको चुनौती दिएको छ।

मुम्बइको वानखेडे स्टेडियममा टस हारेर पहिला ब्याटिङमा तानिएको नेपाल ३ बल बाँकी छँदै १ सय २३ रनमा अलआउट भएको हो।

नेपालका लागि आरिफ शेखले २७, कप्तान रोहित पौडेलले २३, आसिफ शेखले २० रन बनाउँदा दीपेन्द्रसिंह ऐरी १७ रनमा आउट भए। नन्दन यादव र ललित राजवंशी शून्यमा आउट हुँदा करण केसी १८ रनमा अविजित रहे।

दोहोरो स्कोरमा रन बनाउन नसकेका खेलाडीहरु लोकेश बम र गुल्सन झा समान ३ रनमा पेभेलियन फर्किँदा कुशल भुर्तेल र सन्दीप लामिछाने समान ५ रनमा आउट भए।

केहीबेरमा इटलीले जवाफी ब्याटिङ सुरु गर्नेछ। नेपालले टी–२० आईमा पहिलो पटक इटलीको सामना गरिरहेको हो। तर, ५० ओभरको खेलमा भने नेपाल र इटली ३ पटक आमनेसामने भइसकेका छन्।

इटलीसँग भएका तीनै भेटमा नेपालले नतिजा आफ्नो पक्षमा पारेको छ।